<<< | ОГЛАВЛЕНИЕ | БИБЛИОТЕКА | >>>


См. также: Послание к Колоссянам св. ап. Павла
(шрифт на основе старой кириллицы)

ПОИСК ФОРУМ

 

Новый Завет

На церковно-славянском языке гражданским шрифтом

Главы: 1 | 2 | 3 | 4

Послание к колоссаемъ святаго апостола павла

Глава 1.

Зачало 249.

1 Павел, апостол иисус христов волею божиею, и тимофей брат,
2 сущим в колоссаех святым и верным братиямъ о христе иисусе:
3 благодать вам и мир от бога отца нашего, и господа иисуса христа. Благодарим бога и отца господа нашего иисуса христа, всегда о вас молящеся,
4 слышавше веру вашу, яже о христе иисусе, и любовь, юже имате ко всем святым,
5 за упование отложенное вам на небесех, еже прежде слышасте в словеси истины благовествования,
6 сущаго в вас, якоже и во всем мире: и есть плодоносно и растимо, якоже и въ вас, от негоже дне слышасте и разуместе благодать божию во истине:
7 якоже и уведесте от епафраса, возлюбленнаго соработника нашего, иже есть верен о васъ служитель христов,
8 иже и яви нам вашу любовь в дусе.
9 Сего ради и мы, от негоже дне слышахом, не престаем о вас молящеся и просяще, да исполнитеся в разуме воли его, во всяцей премудрости и разуме духовнем,
10 яко ходити вам достоине богу во всяцемъ угождении (и) всяцем деле блазе, плодоносяще и возрастающе в разуме божии,
11 всякою силою возмогающе по державе славы его, во всяцем терпении и долготерпении с радостию,
12 (Зачало 250) благодаряще бога и отца, призвавшаго вас в причастие наследия святых во свете,
13 иже избави нас от власти темныя и престави в царство сына любве своея,
14 о немже имамы избавление кровию его и оставление грехов,
15 иже есть образ бога невидимаго, перворожденъ всея твари:
16 яко тем создана быша всяческая, яже на небеси и яже на земли, видимая и невидимая, аще престоли, аще господствия, аще начала, аще власти: всяческая тем и о нем создашася:
17 и той есть прежде всех, и всяческая в нем состоятся.
18 (Зачало 251) И той есть глава телу церкве, иже есть начаток, перворожден из мертвых, яко да будет во всех той первенствуя:
19 яко в нем благоизволи всему исполнению вселитися,
20 и тем примирити всяческая к себе, умиротворивъ кровию креста его, чрез него, аще земная, аще ли небесная.
21 И вас, иногда сущих отчужденных и враговъ помышленьми в делех лукавых,
22 ныне же примири в теле плоти его смертию его, представити вас святых и непорочныхъ и неповинных пред собою,
23 аще убо пребываете в вере основани и тверди, и неподвижими от упования благовествования, еже слышасте, проповеданное всей твари поднебесней, емуже бых аз павел служитель.
24 (Зачало 252) ныне радуюся во страданиих моихъ о вас, яко исполняю лишение скорбей христовыхъ во плоти моей за тело его, еже есть церковь,
25 ейже бых аз служитель по смотрению божию, данному мне в вас, исполнити слово божие,
26 тайну сокровенную от век и от родов: ныне же явися святым его,
27 имже восхоте бог сказати, кое богатство славы тайны сея во языцех, иже есть христосъ в вас, упование славы,
28 егоже мы проповедуем, наказующе всякаго человека и учаще всяцей премудрости, да представим всякаго человека совершенна о христе иисусе:
29 в немже и труждаюся и подвизаюся по действу его действуемому во мне силою.

 

Глава 2.

Зачало 253.

1 Хощу убо вас ведети, колик подвиг имамъ о вас и о сущих в лаодикии и во иераполи, и елицы не видеша лица моего во плоти,
2 да утешатся сердца их, снемшихся в любви и во всяцем богатстве извещения разума, въ познание тайны бога и отца и христа,
3 в немже суть вся сокровища премудрости и разума сокровенна.
4 Сие же глаголю, да никтоже вас прельститъ в словопрении:
5 аще бо и плотию отстою, но духом с вами есмь, радуяся и видя ваш чин и утверждение вашея веры, яже во христа.
6 якоже убо приясте христа иисуса господа, (такожде) в нем ходите,
7 укоренени и наздани в нем и извествовани верою, якоже научистеся, избыточествующе въ ней благодарением.
8 (Зачало 254) (Братие,) блюдитеся, да никтоже васъ будет прельщая философиею и тщетною лестию, по преданию человеческому, по стихиам мира, а не по христе:
9 яко в том живет всяко исполнение божества телесне:
10 и да будете в нем исполнени, иже есть глава всякому началу и власти:
11 о немже и обрезани бысте обрезаниемъ нерукотворенным, в совлечении тела греховнаго плоти, во обрезании христове,
12 спогребшеся ему крещением: о немже и совостасте верою действия бога, воскресившаго его из мертвых:
13 (Зачало 255) и вас, мертвых сущих в прегрешениихъ и в необрезании плоти вашея, сооживил есть с ним, даровав нам вся прегрешения,
14 истребив еже на нас рукописание ученьми, еже бе сопротивно нам, и то взят от среды, пригвоздив е на кресте:
15 совлек начала и власти, изведе в позоръ дерзновением, изобличив их в себе [победивъ их на немъ].
16 Да никтоже убо вас осуждает о ядении, или о питии, или о части праздника, или о новомесячиих, или о субботах:
17 яже суть стень грядущих, тело же христово.
18 Никтоже вас да прельщает изволенным ему смиреномудрием и службою ангелов, яже не уведе учя, [(в техъ) ходя], без ума [всуе] дмяся от ума плоти своея,
19 а не держя главы, из неяже все тело, составы и соузы подаемо и снемлемо, раститъ возращение божие.
20 (Зачало 256) Аще убо умросте со христомъ от стихий мира, почто аки живуще в мире стязаетеся?
21 Не коснися, ниже вкуси, ниже осяжи:
22 яже суть вся во истление употреблением, по заповедем и учением человеческим:
23 яже суть слово убо имуща премудрости в самовольней службе и смиреномудрии и непощадении тела, не в чести коей к сытости плоти.

 

Глава 3.

1 Аще убо воскреснусте со христом, вышнихъ ищите, идеже есть христос о десную бога седя:
2 горняя мудрствуйте, (а) не земная.
3 умросте бо, и живот ваш сокровен есть со христом в бозе:
4 (Зачало 257) егда (же) христос явится, животъ ваш, тогда и вы с ним явитеся в славе.
5 умертвите убо уды ваша, яже на земли: блуд, нечистоту, страсть, похоть злую и лихоимание, еже есть идолослужение,
6 ихже ради грядет гнев божий на сыны противления,
7 в нихже и вы иногда ходисте, егда живясте в них.
8 ныне же отложите и вы та вся: гнев, ярость, злобу, хуление, срамословие от уст ваших:
9 не лжите друг на друга, совлекшеся ветхаго человека с деяньми его
10 и облекшеся в новаго, обновляемаго в разумъ по образу создавшаго его,
11 идеже несть еллин, ни иудей, обрезание и необрезание, варвар и скиф, раб и свободь, но всяческая и во всех христос.
12 (Зачало 258) облецытеся убо якоже избраннии божии, святи и возлюбленни, во утробы щедрот, благость, смиреномудрие, кротость и долготерпение,
13 приемлюще друг друга и прощающе себе, аще кто на кого имать поречение: якоже и христосъ простил есть вам, тако и вы.
14 Над всеми же сими (стяжите) любовь, яже есть соуз совершенства:
15 и мир божий да водворяется в сердцах ваших, в оньже и звани бысте во едином теле: и благодарни бывайте.
16 Слово христово да вселяется в вас богатно, во всякой премудрости: учаще и вразумляюще себе самех во псалмех и пениих и песнехъ духовных, во благодати поюще в сердцах вашихъ господеви.
17 (Зачало 259) И все, еже аще что творите словом или делом, вся во имя господа иисуса христа, благодаряще бога и отца тем.
18 Жены, повинуйтеся своим мужем, якоже подобает о господе.
19 Мужие, любите жены ваша, и не огорчайтеся к ним.
20 Чада, послушайте родителей (своихъ) во всем: сие бо угодно есть господеви.
21 отцы, не раздражайте чад ваших, да не унывают.
22 Раби, послушайте по всему плотских господий (вашихъ), не пред очима точию работающе аки человекоугодницы, но в простоте сердца, боящеся бога.
23 И всяко, еже аще что творите, от души делайте, якоже господу, а не человеком,
24 ведяще, яко от господа приимете воздаяние достояния: господу бо христу работаете.
25 А обидяй восприимет, еже обиде: и несть лица обиновения.

 

Глава 4.

1 Господие, правду и уравнение рабом подавайте, ведяще, яко и вы имате господа на небесех.
2 (Зачало 260) В молитве терпите, бодрствующе в ней со благодарением:
3 молящеся и о нас вкупе, да бог отверзетъ нам двери слова, проглаголати тайну христову, еяже ради и связан есмь:
4 да явлю ю, якоже подобает ми глаголати.
5 В премудрости ходите ко внешним, время искупующе.
6 Слово ваше (да бываетъ) всегда во благодати, солию растворено, ведети, како подобает вам единому комуждо отвещавати.
7 яже о мне, вся скажет вам тихик, возлюбленный брат и верен служитель и соработник о господе,
8 егоже послах к вам на се истое, да разумеетъ яже о вас и утешит сердца ваша,
9 со онисимом, верным и возлюбленным братомъ нашим, иже есть от вас: вся вам скажут, яже зде.
10 (Зачало 261) Целует вы аристарх спленникъ мой, и марко анепсий варнавин, о немже приясте заповеди: аще приидет к вам, приимите его:
11 и иисус нареченный иуст, сущий от обрезания: сии едини споспешницы во царство божие, иже быша ми утешение.
12 Целует вы епафрас, иже от вас, рабъ иисуса христа, всегда подвизаяйся о вас в молитвах, да будете совершени и исполнени во всяцей воли божией.
13 Свидетелствую бо о нем, яко имать ревность многу (и болезнь) о вас и о сущих в лаодикии и во иераполи.
14 Целует вы лука врачь возлюбленный, и димас.
15 Целуйте братию сущую в лаодикии, и нимфана, и домашнюю его церковь.
16 И егда прочтется послание сие у вас, сотворите, да и в лаодикийстей церкви прочтено будет, и написаное от лаодикии да и вы прочтете.
17 И рцыте архиппу: блюди служение, еже приял еси о господе, да довершиши е.
18 Целование моею рукою павлею. Поминайте моя узы. благодать со (всеми) вами. Аминь.

 

Конец посланию еже к колоссаем: имать в себе главы 4, зачал же церковных 13.

 

 

Система Orphus Заметили ошибку в тексте? Выделите её мышкой и нажмите Ctrl+Enter


<<< | ОГЛАВЛЕНИЕ | БИБЛИОТЕКА | >>>